Peb Tuaj Yeem Pab Tau Li Cas

Peb nyob ntawm no los mus pab koj.

Nov yog qee cov piv txwv txog txoj hau kev uas tej zaum VRLC tuaj yeem los mus pab tau.

Ntiag Tug

Peb tuaj yeem koom tes nrog koj txhawm rau ua tiag los mus khaws koj tus kheej cov txheej xwm ntiag tug.

Yog tias muaj qee yam yog kev ntiag tug uas koj yuav tsis xav pub lwm tus neeg paub. Nyob rau rooj plaub uas yuav raug teem txim, tus neeg uas ua phem rau koj yuav muaj ib tug kws lij choj. Tus kws lij choj ntawd yuav sim muab kom tau koj cov txheej xwm ntiag tug. Qhov no tuaj yeem yog cov txheej xwm uas koj tus kws kho mob, lub tsev kawm ntawv, los sis lwm tus neeg muaj txog koj. Tej zaum peb kuj tseem yuav tuaj yeem los mus pab ceev koj tus kheej cov txheej xwm ntiag tug cia.

Peb tuaj yeem sib tham txog txoj hau kev tiv thaiv koj li ntiag tug rau txhua yam ntawm koj lub neej, xws li tom tsev kawm ntawv, hauj lwm, ib lub lub tes dej num, thiab hauv tsev hais plaub.

Yog tias koj muaj ib roog plaub nyob hauv tsev hais plaub los sis rooj sib hais hauv koj lub tsev kawm ntawv, tej zaum koj yuav txhawj xeeb txog tias tsam muaj neeg yuav los tham los sis nug txog koj lub keeb kwm fab kev sib daj sib deev yam tsis muaj kev tso cai los ntawm koj. Qhov no yog nce rau ntawm hom plaub ntug uas koj muaj, cov teeb meem ntawm rooj plaub, thiab seb tus neeg txiav txim rooj plaub xav paub txog dab tsi.  Yuav siv cov cai sib txawv rau hom plaub ntug uas sib txawv. Thov hu rau peb yog tias koj muaj kev txhawj xeeb txog qhov uas tshwm sim no.

Peb kuj tseem tuaj yeem nrog koj sib tham txog txoj hau kev yuav ceev koj tus kheej cov txheej xwm ntiag tug nyob hauv online tau thiab.

Kev Nyab Xeeb

Yog tias koj raug quab yuam thiab raug tsim txom mos deev, tej zaum koj yuav hnov tau tias tsis muaj kev nyab xeeb.

Tej zaum koj yuav xav kom tsev hais plaub lo lus txib txog kev txwv. Lo lus txib ntawd yuav hais kom tus neeg uas ua phem rau koj yuav tsum txav kom deb ntawm koj thiab tsis txhob ua phem rau koj ntxiv lawm. 

Kev tsis ua raws lo lus txib no kuj tseem yuav hu ua kev yuam cai rau lo lus txib txog kev txwv.  Yog tias tus neeg uas ua phem rau koj yuam cai rau lo lus txib txog kev txwv, yog tias koj hu rau tub ceev xwm, ces tej zaum nws yuav raug ntes.  Tus neeg ua phem rau koj kuj tseem yuav tau mus tom tsev hais plaub txhawm rau muab teem txim rau kev yuam cai rau lo lus txib txog kev ua phem. 

Tej zaum VRLC kuj yuav tuaj yeem pab koj thov kom tsev hais plaub tawm lo lus txib txog kev txwv thiab. Tej zaum peb kuj tseem yuav tuaj yeem pab koj nrog tus kws txiav txim plaub sib tham thiab thaum koj mus tom tsev tu plaub rau lo lus txib txog kev txwv. 

Kev tau txais lo lus txib txog kev txwv tsis tuaj yeem lav tau tias tus neeg ua phem rau koj yuav txav deb ntawm koj. Yog tus neeg ua phem rau koj tsis quav ntsej txog lo lus txib txog kev txwv, tej zaum koj kuj tseem yuav tsum tau sim lwm cov cai kev pov thaiv kev nyab xeeb. VRLC tuaj yeem pab koj xav txog txoj phiaj xwm kev nyab xeeb.

Kev Tau Txais Lo Lus Txib Txog Kev Txwv Hauv Lav Massachusetts

Nyob hauv Lav Massachusetts yog muaj ob hom lus txib txog kev txwv xws li:

  1. Lo Lus Txib Txog Kev Tiv Thaiv Kev Tsim Txom 209A yuav pab cov neeg uas tau txais kev ua phem los ntawm lwm tus neeg uas lawv nrog nyob, los ntawm lwm tus neeg hauv lawv tsev neeg, los sis los ntawm tus neeg sib raug zoo.
  2. Lo Lus Txib Txog Kev Tiv Thaiv Kev Thab Plaub 258E yuav pab cov neeg uas tau txais kev ua phem los ntawm lwm tus neeg. Nws kuj tseem tuaj yeem yuav pab cov neeg uas raug ib tug neeg twg soj qab txias los sis thab plaub.
  3. Peb kuj tseem yuav tuaj yeem pab kom koj tau txais lo lus txib tsis pub hla dhau ciam rau koj lub tsev kawm ntawv, hauj lwm, tsev nyob, chaw saib xyuas nruab hnub, los sis qhov chaw uas koj nyob. Lo lus txib tsis pub hla dhau ciam txhais tau tias tus neeg ua phem rau koj yuav tsum txav kom deb ntawm thaj chaw ntawd.

Kev Tau Txais Lo Lus Txib Txog Kev Txwv Hauv Lav Oregon

Nyob hauv Lav Oregon yog muaj plaub hom lus txib txog kev txwv xws li:

  1. Lo lus txib Txoj Cai Tiv Thaiv Kev Tsim Txom  Cov Neeg Laus thiab Cov Neeg Xiam Oob Qhab yuav pab cov neeg uas muaj hnub nyoog 65 xyoos nce mus thiab cov neeg xiam oob qhab uas tau txais kev ua phem nyob rau sij hawm 180 hnub dhau los, thiab tus neeg uas poob rau kev phom sij uas tseem yuav raug tsim txom dua ntxiv.
  2. Lo lus txib Txoj Cai Tiv Thaiv Kev Tsim Txom Tau Tsev Neeg  yuav pab tus neeg uas tau txais kev ua phem nyob rau 180 hnub dhau los los ntawm lwm tus niam txiv ntawm lawv cov me nyuam, ib tug neeg hauv lawv tsev neeg, los sis los ntawm ib tug neeg sib raug zoo, thiab tus neeg uas poob rau kev phom sij uas tseem yuav raug tsim txom dua ntxiv.
  3. Lo Lus Txib Txog Kev Tiv Thaiv Kev Tsim Txom Rau Kev Sib Daj Sib Deev yuav pab rau tus neeg uas tau raug quab yuam deev nyob rau sij hawm 180 hnub dhau los ntawm lwm tus neeg, thiab tus neeg uas ntshai tias lawv yuav rov raug ua phem ntxiv. 
  4. Los Lus Txib Txog Kev Soj Qab Txias yuav pab tus neeg uas tau muaj kev sib cuag nrog lwm tus neeg uas yus tsis txaus siab rau txij li ob zaug nce mus nyob rau sij hawm ob xyoos dhau los, thiab tus neeg uas muaj kev ntshai txog kev nyab xeeb ntawm lawv tus kheej los sis kev nyab xeeb ntawm cov neeg hauv tsev neeg. 

Kev Kawm

VRLC pab cov tub ntxhais kawm nyob hauv tsev kawm me nyuam yaus (preschool), tsev kawm theem pib, tsev kawm theem nrab, tsev kawm teem siab, thiab tsev kawm qib siab uas raug quab yuam mos deev tag nrho hauv Lav Massachusetts thiab Oregon tib si. 

  • Peb yuav tuaj yeem pab koj kom tau txais kev pab cuam rau kev kawm ntawv tshwj xeeb los ntawm koj lub tsev kawm ntawv.
  • Tej zaum peb tuaj yeem yuav pab kom tus neeg ua phem rau koj txav kom deb ntawm koj mus tom tsev kawm ntawv.
  • Tej zaum peb yuav tuaj yeem pab koj hloov mus kawm rau lwm lub tsev kawm ntawv tau yam muaj kev nyab xeeb.
  • Tej zaum peb yuav tuaj yeem pab koj thov koj lub tsev kawm ntawv txog lwm yam uas koj hnov tias yuav ua rau koj muaj kev nyab xeeb.
  • Tej zaum peb yuav tuaj yeem pab koj ua daim ntawv tsis txaus siab yog tias koj lub tsev kawm ntawv muaj kev ntxub ntxaug koj, los sis yog tias lawv tsis ua yam uas lawv yuav tsum tau ua los mus pab koj.
  • Yog tias koj raug quab yuam hauv tsev kawm ntawv, koj lub tsev kawm ntawv yuav tsum tau tshuaj xyuas qhov teeb meem tshwm sim ntawd. Lawv yuav hu qhov no ua “tus txheej txheem kev rau txim” los sis “kev tshawb nrhiav raws Title Nine.”Lub tsev kawm ntawv yuav xav los mus nug koj. Lawv yuav tau rau txim rau tus neeg ua phem rau koj. Yog tias qhov txheej txheem no tshwm sim, peb yuav tuaj yeem pab koj hla nws tau.

Kev Tsiv Teb Tsaws Chaws

Lub Chaw Saub Xyuas Tus Neeg Raug Tsim Txog Cov Cai Lij Choj muaj cov kws lij choj uas hais tau lus Xab Pees Niv hauv peb cov chaw ua hauj lwm hauv Lav Massachusetts thiab Oregon. Peb siv cov kws txhais lus rau lwm yam lus.

  • Lub VRLC yuav pab cov neeg dim los ntawm kev ua phem txog kev sib daj sib deev uas tsis yog neeg xam xaj Meskas. Yog tias koj tsis yog neeg xam xaj Meskas tab sis koj xav nyob nov los sis tuaj yeem ua hauj lwm ntawm nov, peb yuav tuaj yeem pab tau.
  • Qee yam uas peb tuaj yeem pab koj ua ntawv thov tau yog muaj:
    • Daim U-Visa
    • Daim T-Visa 
    • VAWA Qhov Kev Xa Ntawv Thov Los Ntawm Yus Tus Kheej (Tsab Cai Hais Txog Kev Ua Phem Rau Poj Niam)
    • Chaw Khiav Nkaum
    • SIJS (Xwm Txheej Neeg Tsiv Teb Chaws Tshwj Xeeb Rau Cov Neeg Hluas)
    • Kev Tso Cai Ua Hauj Lwm

Thov hu rau peb los mus tham nrog tus kws lij choj fab kev tsiv teb chaws txog yam kev pab uas yuav haum rau koj.

Vaj Tsev Nyob

Yog tias koj yog tus neeg poob phem rau kev quab yuam mos deev, thiab tej zaum tam sim no koj yuav muaj teeb meem rau ntawm thaj chaw uas koj nyob. Qhov no kuj txhais tau tias koj hnov tau tias tsis muaj kev nyab xeeb lawm los sis tus tswv tsev xav kom koj tawm mus lawm. Muaj ntau yam uas koj tuaj yeem ua tau los mus sim daws kho cov teeb meem no. 

Qee yam uas koj yuav tuaj yeem ua tau:

  • Tej zaum koj yuav xav tsiv tawm.
  • Tej zaum koj yuav xav hloov koj lub pob xauv qhov rooj.
  • Tej zaum koj yuav xav thov kom tus tswv tsev pab ua kev yooj yim rau koj. Kev pab ua kev yooj yim yog tej yam uas ua rau koj hnov tau tias muaj kev nyab xeeb dua, los sis ua kom koj nyob tau yooj yim dua rau qhov ntawd, xws li cia koj yug tsiaj.
  • Koj tuaj yeem tau txais qhov uas hu tias “lo lus txib txog kev tsis pub hla dhau ciam” los ntawm qhov chaw uas koj nyob uas qhia hais tias tus neeg ua phem rau koj yuav tsis tuaj yeem tuaj rau ntawm koj lub tsev. 
  • Yog tias koj muaj daim ntawv xauj tsev thiab tus neeg ua phem rau koj yog tus neeg uas nrog koj muaj npe hauv daim ntawv xauj tsev, ces koj tuaj yeem muab lawv tshem tawm mus. 
  • Qee zaum, cov tswv tsev yuav sim los mus ntiab cov neeg tawm. Kev ntiab tawm txhais tau tias ib tug neeg kom koj tsiv tawm hauv koj lub tsev mus. Tej zaum peb yuav tuaj yeem pab kom koj tau nyob hauv koj lub tsev. 
  • Tej zaum koj yuav xav ua qee yam kom koj hnov muaj kev nyab xeeb dua qub tuaj. Tej zaum peb yuav tuaj yeem pab koj ua tej ntawd.

Kev Ua Hauj Lwm

Kev quab yuam mos deev tuaj yeem tsim kev nyuaj rau qee leej neeg tom hauj lwm tau.

Txoj hau kev uas VRLC yuav tuaj yeem pab tau:

  • Tej zaum koj yuav hnov tias tsis muaj kev nyab xeeb tom hauj lwm. Tej zaum koj yuav xav siv sij hawm los mus so. Tej zaum koj yuav xav hloov koj lub sij hawm ua hauj lwm. Tej zaum yuav muaj lwm yam uas koj xav tau tom hauj lwm. Tej zaum peb yuav xav nrog qee leej tom kom qhov chaw ua hauj lwm sib tham txhawm rau los mus pab tej yam no rau koj.
  • Tej zaum peb yuav tuaj yeem pab koj thov kom sij hawm so txhawm rau los mus tom tsev hais plaub.
  • Tej zaum peb yuav tuaj yeem pab koj xav seb koj puas tuaj yeem so hauj lwm tau ntev dua qub raws li Family and Medical Leave Act (Tsab Cai Txog Kev So Hauj Lwm rau Tsev Neeg thiab rau Kev Kho Mob).
  • Tej zaum peb yuav tuaj yeem pab kom koj tau txais lo lus txib txog kev tsis pub hla dhau ciam uas yuav ua kom tus neeg ua phem rau koj txav kom deb ntawm qhov chaw koj ua hauj lwm.
  • Tej zaum peb yuav tuaj yeem pab koj ua daim ntawv tsis txaus siab yog tias koj tsis tau txais kev them nyiaj vim yog kev raug quab yuam mos deev.
  • Tej zaum peb yuav tuaj yeem pab koj ua ntawv thov rau Kev Ntxiv Nyiaj Rau Cov Neeg Ua Hauj Lwm. Qhov no tuaj yeem pab kom koj tau txais cov nyiaj uas poob mus lawm thaum sij hawm koj tsis tuaj yeem ua hauj lwm tau. Nws kuj tseem tuaj yeem them cov nqi kho mob tib si thiab. 
  • Tej zaum peb yuav tuaj yeem pab koj thov kev pab rau chaw pw tom hauj lwm yog tias koj xav tau. 
  • Nws yog ib qho txhaum cai uas koj tus tswv hauj lwm muaj kev ntxub ntxaug koj vim kev xiam oob qhab los sis vim koj raug quab yuam mos deev. Yog tias koj tus tswv hauj lwm yuam cov cai no, peb yuav tuaj yeem pab koj ua ntawv foob los sis tsis txaus siab.

Kev Ruaj Ntseg Rau Fab Nyiaj Txiag

Yog tias koj raug quab yuam mos deev, tej zaum koj yuav muaj kev ntxhov siab heev vim txhawj xeeb txog nyiaj txiag los sis xyov koj yuav them koj cov nqi ub nqi no tau li cas. Cov no yog qee cov tes dej num them nyiaj thiab cov nyiaj pab uas peb yuav tuaj yeem pab koj nkag mus txog tau:

Tsoom Hwv Cov Nyiaj Pab Cuam

  • Tsoom hwv cov nyiaj pab cuam uas peb tuaj yeem pab koj tau yog muaj:
    • SSI/SSDI (Kev Ruaj Ntseg Rau Zej Tsoom)
    • Lub SNAP (lub cim khoom noj haus)
    • Kev Pab Nyiaj Ntsuab DTA (TAFDC/EAEDC) (Massachusetts nkaus xwb)
    • Nyiaj Tuav Pov Hwm Rau Kev Poob Hauj Lwm (UI)

  • Yog tias koj tsis tau txais tsoom fwv cov nyiaj pab uas koj tsim nyog tau txais, ces peb yuav tuaj yeem qhia koj tias seb yuav mus ua ntawv thov qhov twg thiab yuav thov li cas.
  • Yog koj tau ua ntawv thov cov nyiaj pab lawm tab tseem tsis tau laib nyiaj, tej zaum peb yuav tuaj yeem pab tau koj.
  • Yog tias muaj qee yam txawv txav nrog tsoom fwv cov nyiaj pab uas koj twb tau txais lawm, peb yuav tuaj yeem pab koj los mus daws kho nws.

Lub Tes Dej Num Them Nyiaj Rau Cov Neeg Raug Tsim Txom Ntawm Lub Lav

Txhua lub lav nyias muaj nyias ib lub khoos kas Them Nyiaj Rau Cov Neeg Raug Tsim Txom. Koj tuaj yeem ua ntawv thov rau lub khoo kas Them Nyiaj Rau Cov Neeg Raug Tsim Txom hauv koj lub lav kom them cov nqi los sis cov nyiaj poob mus lawm rov qab, uas tau tshwm sim vim kev quab yuam mos deev. 

Qee cov piv txwv ntawm tej yam uas cov tes dej num Them Nyiaj Rau Cov Neeg Raug Tsim Txom yuav them nyiaj rau yog muaj xws li cov nqi kho mob thiab kho hniav, nqi kho, los sis cov nqi zog uas poob mus lawm.Koj tuaj yeem ua ntawv thov rau lub tes dej num Them Nyiaj Rau Cov Neeg Raug Tsim Txom tsis hais koj khwv tau nyiaj npaum li cas los xij thiab tsis hais koj yog neeg xam xaj dab tsi los xij. 

Cov ntawv thov nkag rau cov tes dej num Them Nyiaj Rau Cov Neeg Raug Tsim Txom yog muaj nyob ntawm no rau Lav Massachusetts thiab Oregon.  Yog tias koj xav tau kev pab txog cov tes dej num Them Nyiaj Rau Cov Neeg Raug Tsim txom los sis yog muaj lus nug txog lub tes dej num no, thov hu rau peb. Hais txog rau cov khoos kas Them Nyiaj Raug Cov Neeg Raug Tsim Txom hauv lwm lub lav, thov mus saib ntawm National Association of Crime Victim Compensation Boards (Lub Koom Haum Hauv Teb Chaws ntawm Pawg Neeg Saib Xyuas Kev Them Nyiaj Rau Cov Neeg Raug Tsim Txom)

Kev Hloov Pauv Daim Npav ID ntawm Cov Neeg Pauv Mus Ua Poj Niam Los Sis Txiv Neej

Cov neeg dim los uas yog cov neeg hloov pauv mus ua poj niam los sis txiv neej tuaj yeem hloov tau lawv lub npe thiab/los sis lawv qhov yog poj niam/txiv neej ntawm daim ntawv txheeb tib neeg tau yam raug cai (xws li daim npav Kev Pov Hwm Zej Tsoom los sis daim ntawv hla teb chaws)  Qhov no yog qee yam uas VRLC tuaj yeem pab tau.

Cov txheej xwm thiab cov lus coj qhia ib qib zuj zus rau Kev Thov Kev Hloov Lub Npe-Poj Niam los sis Txiv Neej hauv Lav Oregon hauv txhua 36 lub nroog hauv Lav Oregon tuaj yeem nrhiav tau ntawm no.

VRLC cov neeg ua hauj lwm tuaj yeem muab lus qhia txog tus txheej txheem, pab sau thiab ua cov ntawv, thiab muaj qee zaus kuj tseem yuav sawv cev nyob rau hauv tsev hais plaub tib si (yog tias tsim nyog).Tej zaum VRLC kuj tseem yuav tuaj yeem them qee cov nqi hloov pauv daim ID thiab.*

*Peb cov kev pab cuam yeej pub dawb tas li.VRLC tuaj yeem pab them cov nqi thaum cov nyiaj tseem muaj. 

Kev Pab Kev Ncaj Ncees Rau Kev Ua Txhaum Cai Teem Txim

Rooj plaub kev ua txhaum cai teem txim yuav tshwm sim thaum tus neeg ua phem rau koj raug foob, los sis raug iab liam tias ua txhaum nyob hauv tsev tu plaub.Tej zaum koj kuj yeej tau hnov txog xwm txheej thaum muaj rooj plaub kev ua txhaum cai tshwm sim lawm uas yog hu ua Lub Txhooj Kev Ncaj Ncees Rau Kev Ua Txhaum Cai Teem Txim los sis Lub Txhooj Kev Ua Txhaum Cai Teem Txim. 

Yog tias koj xav kom ua rooj plaub kev ua txhaum cai teem txim rau tus neeg ua phem rau koj, feem ntau thawj yam uas koj yuav tsum ua yog ceeb toom yam uas tshwm sim rau koj mus rau tub ceev xwm.Yog tias koj xav tham txog rooj plaub kev ua txhaum cai teem txim los sis xav nug txog txoj hau kev los mus tshaj qhia rau tub ceev xwm, koj tuaj yeem hu rau VRLC.

Leej twg yog tus uas nyob hauv Lub Txhooj Kev Ncaj Ncees Rau Kev Ua Txhaum Cai Teem Txim?

  • “Tus Neeg Ua Tim Khawv-Tus Neeg Raug Tsim Txom” los sis “Tus Neeg Raug Tsim Txom” yog tus neeg uas raug quab yuam mos deev.
    • Tus Neeg Raug Tsim Txom yog ib tug neeg ua pov thawj nyob hauv rooj plaub kev ua txhaum cai teem txim. Tus neeg ua pov thawj yog tus neeg uas paub txog yam uas tau tshwm sim thiab cog lus los mus qhia qhov tseeb rau lub tsev hais plaub txog yam uas tshwm sim. 
    • Tus Neeg Raug Tsim Txom tsis yog tog neeg ntawm rooj plaub. Qhov no txhais tau hais tias Tus Neeg Raug Tsim Txom tsis yog tus tswj yam uas yuav tshwm sim hauv rooj plaub. Tab sis feem ntau Tus Kws Lij Choj Hauv Cheeb Tsam yuav nug Tus Neeg Raug Tsim Txom tias lawv xav kom ua li cas. 
  • “Tus District Attorney (Tus Kws Lij Choj Hauv Lub Cheeb Tsam)” yog tus kws lij choj rau lub lav. 
    • Tus District Attorney (Tus Kws Lij Choj Hauv Lub Nroog) yog tus txiav txim tias yuav ua li cas hauv rooj plaub kev ua txhaum cai teem txim. Tus Kws Lij Choj Hauv Cheeb Tsam) tsis yog tus neeg raug tsim txom tus kws lij choj. Yam uas Tus Neeg Raug Tsim Txom hais rau Tus Kws Lij Choj Hauv Cheeb Tsamyuav tsis muaj cai tshwj xeeb los sis yuav tsis raug npog zais. Tus Kws Lij Choj Hauv Cheeb Tsam yuav thiab qee zaum yuav tsum qhia rau tus kws lij choj ntawm tog raug foob txog yam uas Tus Neeg Raug Tsim Txom tau hais.  
  • “Tus Neeg Pab Txhawb Nqa Tus Neeg Ua Tim Khawv-Tus Neeg Raug Tsim Txom” ua hauj lwm nyob rau hauv Tus Kws Lij Choj Hauv Lub Nroog lub chaw ua hauj lwm. 
    • Lawv tsis yog tus tswj hwm yam tshwm sim nyob hauv rooj plaub.Lawv yuav pab qhia rau cov neeg raug tsim txom hais txog yam tab tom tshwm sim hauv rooj plaub kev ua txhaum cai teem txim.Lawv yuav tsum pab ua kev yooj yim dua qub rau kev los mus nrog Tus Kws Lij Choj Hauv Lub Cheeb Tam sib tham. Txhua yam uas Tus Neeg Raug Tsim Txom qhia rau Tus Neeg Pab Txhawb Nqa Tus Neeg Ua Tim Khawv-Tus Neeg Raug Tsim Txom yuav tsis muaj cai tshwj xeeb los sis yuav tsis raug npog zais. Tus Neeg Pab Txhawb Nqa Tus Neeg Ua Tim Khawv-Tus Neeg Raug Tsim Txom yuav tsum hais qhia txhua yam uas Tus Neeg Raug Tsim Txom tau hais rau Tus Kws Lij Choj Hauv Lub Nroog. 
  • “Tus Tub Ceev Xwm thiab Cov Tub Soj Xwm” ntsuam xyuas qhov kev ua txhaum cai teem txim. 
    • Lawv tsis yog kws lij choj thiab tsis sawv cev rau ib tug neeg twg. Txhua yam uas Tus Neeg Raug Tsim Txom qhia rau tus tub ceev xwm yuav tsis muaj cai tshwj xeeb los sis yuav tsis raug npog zais. Txhua yam uas Tus Neeg Raug Tsim Txom hais rau tus tub ceev xwm tuaj yeem muab sau tau rau hauv tub ceev xwm daim ntawv tshaj tawm, tuaj yeem muab rau tus neeg ua phem rau lawv, thiab/los sis muab rau Tus Kws Lij Choj Hauv Cheeb Tsam. 
  • “Tus Neeg Raug Foob” yog qhov uas lub txhooj kev ncaj ncees rau kev ua txhaum cai teem txim hu tus neeg ua phem rau Tus Neeg Raug Tsim Txom tom qab lawv raug foob rau kev ua txhaum cai teem txim.

  • “Tus Neeg Raug Foob Tus Kws Lij Choj” sawv cev rau tus neeg raug foob hauv rooj plaub kev ua txhaum cai teem txim. 
    • Tus Neeg Raug Foob Tus Kws Lij Choj txoj hauj lwm yog kam tiag los mus pab Tus Neeg Raug Foob. Tus Neeg Raug Foob Tus Kws Lij Choj tuaj yeem ntiav lawv tus kws tshawb nrhiav los sis nrog cov neeg ua tim khawv los sis Tus Raug Tsim Txom sib tham kiag ncaj qha. Tus Neeg Raug Tsim Txom thiab lwm tus neeg ua tim khawv tsis tas yuav nrog Tus Neeg Raug Foob Tus Kws Lij Choj los sis tus kws tshawb nrhiav tuaj ntawm lub tsev hais plaub sab nrauv tuaj sib tham. 
  • VRLC Cov Kws Lij Choj yog cov kws lij choj rau cov neeg raug tsim txom thiab cov neeg dim los ntawm kev quab yuam mos deev. 
    • Hauv rooj plaub kev ua txhaum cai teem txim, peb tuaj yeem pab cov neeg dim los los ntawm kev ua kom ntseeg tau hais tias lawv nkag siab txog cov txheej txheem kev ncaj ncees ntawm kev ua txhaum cai teem txim. Peb kuj tseem tuaj yeem pab cov neeg raug tsim txom los mus tham nrog Tus Kws Lij Choj Hauv Cheeb Tsam thiab Tus Neeg Pab Txhawb Nqa Tus Neeg Ua Pov Thawj-Tus Neeg Raug Tsim Txom. Qee zaum VRLC tus kws lij choj yuav tuaj yeem pab cov neeg dim los nyob hauv tus txheej txheem kev ua txhaum cai teem txim xws li:
      • Tej zaum peb yuav tuaj yeem los mus pab yog tias Tus Neeg Raug Foob thov lub tsev hais plaub tso cai rau nws nkag mus saib Tus Neeg Raug Tsim Txom cov ntaub ntawv kho mob, kev noj qab haus huv fab kev puas siab puas ntsws, tsev kawm ntawv, hauj lwm, neeg tsiv teb tsaws chaw, los sis lwm yam ntaub ntawv ntiag tug.
      • Tej zaum peb yuav tuaj yeem los mus pab Tus Neeg Raug Tsim Txom nyob rau ntawm tus kws tshuaj xyuas qhov xwm txheej (clerk magistrate) seb ntxim puas yuav tuaj yeem ua rooj plaub tau. Qhov no yog qhov uas Tus Neeg Raug Tsim Txom thov kom lub tsev hais plaub foob tus neeg raug foob tias yog ua txhaum cai teem txim uas tsis muaj Tus Kws Lij Choj Hauv Cheeb Tsam koom nrog. VRLC cov kws lij choj tsis tuaj yeem sawv cev rau koj tau yog tias koj yog tus neeg raug foob nyob hauv rooj plaub.

Txawm tias koj nyob rau qhov twg hauv tus txheej txheem kev ua txhaum cai teem txim, koj tuaj yeem tiv toj VRLC tus kws lij choj los mus tham txog koj cov kev xaiv.

Kev Pab Cov Me Nyuam Yaus thiab Cov Tub Ntxhais Hluas

Yog tias koj yog tus neeg dim los uas yog me nyuam yaus ntawm kev tsim txom txog kev sib daj sib deev, peb yuav tuaj yeem pab koj tau. Koj yuav yog tus neeg thov, thiab peb yuav yog koj tus kws lij choj. Qhov no yog qee yam uas koj yuav tsum tau paub:

  • Koj tuaj yeem hu rau peb yam tsis tas qhia rau koj niam koj txiv.
  • Tam li yog tus neeg thov, koj ua tus txiav txim siab, thiab koj yog tus xaiv yam xav kom peb pab. Muaj ntau yam uas peb yuav tuaj yeem pab tau koj. Nyem rau ntawm lwm qhov chaw (tab) ntawm no los mus saib yam uas peb yuav tuaj yeem pab tau koj.
  • Koj tus kws lij choj yuav hwm koj.Lawv yuav tsis ua ib yam dab tsi dhau tshaj qhov koj xav tau.
  • Koj qhov kev sib tham nrog koj tus kws lij choj ib-toj-ib yuav tsis muaj lwm tus paub thiab muaj cai tshwj xeeb.Qhov no txhais tau tias, lawv yuav tsis qhia lwm tus txog qhov koj tau tham, yam tsis tau txais kev tso cai los ntawm koj.Qhov no kuj yuav suav nrog koj niam koj txiv tib si.Kawm paub ntau ntxiv txog kev npog tsis pub lwm tus paub thiab tus kws lij choj-tus neeg thov cov cai tshwj xeeb ntawm (kab txuas (link) mus rau phab hais txog kev npog tsis pub lwm tus paub).
  • Nyob hauv Lav Massachusetts, tsis tau yuam kom cov kws lij choj yuav tsum los mus tshaj xov xwm.Nyob hauv Lav Oregon, feem ntau, cov kws lij choj tsis tas yuav tsum tau tshaj qhia txog yam uas koj hais yog tias koj tab thov kev pab rau fab kev cai lij choj.Koj tuaj yeem kawm paub ntau ntxiv txog yam uas yuav tsum tau tshaj qhia ntawm (kab txuas (link) mus rau phau ntawv qhia txog yam uas yuav tsum tau tshaj qhia).
  • Yog tias koj yog cov me nyuam yaus loj lawm los sis tiav me nyuam hluas lawm, koj tuaj yeem kos npe tso cai los ntawm koj tus kheej, kom peb tuaj yeem sawv cev tam koj mus nrog lwm tus sib tham. Tab sis koj niam koj txiv los sis tus neeg saib xyuas yuav yog tus txiav txim siab txog koj txoj kev kawm, yog li peb yuav tsum tau koom tes nrog lawv thaum nrog koj lub tsev kawm ntawv sib tham.

Safety Exit